D Gschicht vo üsne Tigere usem Ämmitau
Am 30. Jäner 1946 isch der SC Langnou gebore u sithär i üsne Härze nüm wägzdäiche. Denn im Winter 1946 het äuä no niemer gahnet, zu was dass dä Club no wird wärde. Dr gröscht Erfoug vor Clubgschicht isch dr Meischtertitu im Jahr 1976, wome dehiim ir nöi überdachte Kunstiisbahn, namentlech dr Ilfishaue, gäge EHC Biu dr erscht u bishär iinzig Meischterpokau het gwunne. Dr Spielertrainer Jean Cusson het denn im 76i mitere Mannschaft, wo vor auem us Iheimische bestange het, Gschicht gschriebe u unvergässlechs gschaffe. Ganzi 24 Jahr ischme unungerbroche ir NLA gsi, drbi ischme nün mau hingerenang mindestens ufe dritt Rang cho. Zämä mite Rivale us Bärn u Biu hetme ide 70er-Jahr d Liga dominiert. D Erfouge vo denn si bide Fans immer no presänt u macht d Langnouer Fangmiin bis hüt stouz.
Wos du ide 80er-Jahr geng wie me ums Gäut isch afe ga, u mä grossi Löhn het afe zahle, isches für d' Dorfclubs wie Langnou u Arosa geng wie schwieriger worde, mit de Bonze us Bärn, Lugano u Züri mitzhaute. Afangs vo de 90er-Jahr isch dr SC Langnou finanzieu u sportlech am Ändi gsi u d Tigere si i d Erstliga abgstige, Gäut isch o kes me ume gsi. Für viu Lüt isch denn ä Wäut zämäbroche. Die wenigste hi no dra gluubt, dass dr Kultclub usem Ämmitau no cha grettet wärdä. Doch d Hoffnig stirbt ja bekanntlech z'letscht. Dr Simu Schenk isch cho u het d Hoffnig zrügg brunge ids Tau vode hüülende Winde. Är het der Charre usem Dräck zoge u het Heudestatus erlangt. Är het "auti Spieler" wie ä Jürg Berger oder ä Rolf Tschiemer wider aktiviert u drzue no ä Huufe Juniore i die erschti Mannschaft integriert. Die nöi zämägwürfleti Mannschaft, wo fasch komplett us Ämmitaler bestange het, isch nach nume äre Saison zrügg id NLB ufgstige. Äs Jahr speter ischme zwar nomau id Erstliga abgstige. Wius dä junge Giele no chli ar Erfahrig gfäut het, hets nomau ä nöie sportleche Aluuf ir Erstliga brucht. D Erfahrig hetme du aber grad denn mit Nämä wie Gerber, Moser u Hirschi uf Langnou griicht. Dr Paradesturm mit Turbo-Moser, Hirschi Küsu u Gerber Wale het d Gägner schwindlig gspiut u der SC Langnou mitem ernöite Widerufstieg ändgüutig zrügg id NLB brunge u d Erstliga hoffentlech für aui Zyt vergässä gmacht.
Was us dr Erstliga-Zyt bis hüt unvergässä isch blibe, isch die gränzälosi Tröii vode Fans. D Ahänger vo Nah u Färn hi dr SCL idr schwierigschte Zyt nid la gheie u hi dra gluubt (wär nid dra gluubt, isch ke Tiger), dass Langnou irgendwenn wider wird dert härä cho, wo si härä ghöre.
Wyt über 4000 Fans si dennzumau a d Erstliga-Heimspiu pilgeret. Hunderti, ja mängisch sogar Tuusegi si ad Uswärtsspiu mitgreist u hi Langnou so unstärblech gmacht.
Afangs 90er-Jahr, bir letschte Rückchehr id NLB, im letschte u entscheidende Spiu in Uzwil gägä Wil si 2500 Gäubi u Roti derbi gsi. Bide Ufstiegsheimspiu gägä Visp u Wil isch d Ilfishaue mit 7000 Fans beidi mau vou gsi. Wahnsinn, so öppis isch nume z Langnou müglech!
Nach paar Saisons ir NLB isch Langnou am 7. Apriu 1998 ir usverchuufte Ilfishaue im aues entscheidende Spiu ir Verlengerig gägä Herisou dert härä zrügg kehrt, wome härä ghört: id NLA. Mit derbi den immer no der Wale Gerber! O är het bi üs Heudestatus erlangt. Leider isch är viu zfrüech gstorbe. Aber sis 44i hanget ungerem Stadiondach, isch gsperrt u wird nüm vergä. Äbäfaus gsperrt isch d Nr. 26 vom Tinu Gerber u d Nr. 17 vom Daniel Aegerter. Die zwe hi bim Widerufstieg id NLA o ä grosse Teu drzue biitreit u hi ussertdäm mängi Saison für üser Farbe gspiut. Äs witers Nummero, wo nüm vergä wird, isch z 12i vom Todd Elik. Är isch äuä iine vode beste usländische Spieler, wo je z Langnou hi gspiut. Mit sire Spiuwis u sim grosse Kämpferhärz het o är Kultstatus erlangt u isch bis hüt ä Heud.
Im Jahr 2009 isches um d Tigers widermau gnau gstange. Üse SCL het denn grossi Gäudproblem gha. U wider hets ä Retter brucht. U äs si grad mehreri Retter us dr Region igsprunge. Agfüert vom Verwautigsratspräsidänt Peter Jakob u vom Gmiinspresi, am Antener Bärnu, hi si zämä mit angerne Gschäftsmanne, Fans u witerne wichtige Ungerstützer üse Club wider saniert.
Atribe vom Peter Jakob isch 2012 üsi gliebti Ilfishaue wunderschön saniert worde. Drbi hetme Auts mit Nöiem vermischt u so dr Geischt vor Ilfishaue chöne wahre. Dass üses Hockeystadion o nach dr Sanierig bis hüt geng no Ilfishaue hiisst, isch für üs Fans vo extrem grosser Bedütig. Üses inzigartige Stadion isch für üs äs grosses Stück Heimat, u üse Club isch für viu Lüt wine Art Religion.
Dr Peter Jakob isch für üs ä unhiimlech wichtige Maa. Ihm himer ganz viu z verdanke. Är het mit sire ehrleche, bodeständige u vouksnahe Art lengst Kultstatus erreicht. Danke für Aues, Peter!
Leider si d SCL Tigers im Jahr 2013 ir erschte Saison ir nöisanierte Ilfishaue id NLB abgstiege. Doch ufgä het o denn niemer. Dr Peter Jakob u siner Lüt, aui Mitarbeitende uf dr Gschäftssteu u ä Huufe Spieler si trotz Abstieg z Langnou blibe u hi sofort dr Widerufstieg i Agriff gno.
O mir Fans hi denn inisch me ziigt, das mir üsem SCL i schwierige Zyte nid dr Rügge tüe chere. Nid viu weniger Zueschouer si cho aus ir NLA, u mir hi o ir NLB jedes Spiu zumene Fescht gmacht.
Im Jahr 2015 ischme suverän B-Meister worde u aschliessend ir Ligaquali gägä Rappi grandios id NLA zrüggkehrt.
Sithär ischme ir NLA wieder ä feschte Bestandteu u het bis itz o am Corona guet chöne trotze.
Hoffimer, dass üses ämmitaler Hockey o ir Zuekunft so erfougrich, bodeständig u ehrlech blibt. U dass mir dä Grosse us de Stedt no mängisch chü ä Scheich steue u so üses ifache u ländleche Tau positiv id Schlagziele bringe.